عینتاب احبّای الهی ملاحظه نمایند
ای دوستان یزدان کوکب پیمان و صبح نورانی میثاق آفاقه پرتونثار اولنجه گوزی آچیق اولان مشتاقان دیده‌لری پرنور و گوگللری مسرور و سینه‌لری صحرای طور اوله‌رق تجلّیات رحمانیّتله فیض حبور بولدیلر امّا گوزلری کور و گوگللری زنگ جهالت ایله پاسلانوب خور اولان خفّاشان ناقضان صقیلوب هر بری بر حفرۀ نکبت و فتوره صوقولوب ظلمات شبهات و حفرات مفتریاته اوغرایوب کیمی بو صباح دگل کیمی بو طریق نجاح دگل کیمی انوار غائب و ظلمات غالب‌در دیو ترّهات ایله تفوّه ایتمگه باشلینجه صبح حقیقت شعاع ساطعنی و نور لامعنی صالیویردی خفّاشان پشیمان و طیور لیل اسیر نکبت و ویل اولدیلر ایسه‌ده نه چاره النّار و لا العار الجاءآتیله تعصّب و عناده التزام ایده‌رک میثاق الهینک نصّ جلیلنه و امّ الکتابک برهان و دلیلنه مقاومت ایتمک استیورلر آه آنلره واه آنلره فسوف یرون انفسهم فی خسران مبین ع‌ع
این سند از کتابخانهٔ مراجع بهائی دانلود شده است. شما مجاز هستید از متن آن با توجّه به مقرّرات مندرج در سایت www.bahai.org/fa/legal استفاده نمائید.
آخرین ویراستاری: ۱۷ آوریل ۲۰۲۳، ساعت ۵:۰۰ بعد از ظهر