هواللّه

تفلیس

بواسطۀ آقا میرزا حسین ابن اسم‌اللّه و جناب حاجی علی محمّد احمداوف

جناب آقا علی شماخی جناب آقا مجتبای شماخی جناب آقا علی حسن شماخی جناب آقا غلام شماخی جناب کربلائی صفدر شماخی جناب آقا صفدر شماخی جناب کربلائی علی شماخی جناب آقا علی اصغر اخوی آقا کاظم شماخی جناب آقا مختار اخوی آقا علی اشرف شماخی جناب علی یوسف شماخی علیهم بهآء اللّه الأبهی

هواللّه

ای جان گبی سودیگم یارانم بنم دوست حقیقی حاجی علی محمّد سلیل جناب احمد بر نامه یازمشدر و نامنزی ذکر ایتمشدر نامه‌ده مذکور اولان مبارک ناملرن استماعیله برابر فرح وجدان و مسرّت جان و روح و ریحان حاصل اولدی بو نه مبارک اسملر ایدی که روح و جسمی نشئه‌یاب شوق و اشتیاق و گونلمی بادۀ محبّت ایله سرمست میکدۀ اشراق ایلدی باقن بو نه احساندر نه عنایتدر نه لطف و موهبتدر که بز جسماً داغلمش اطرافه دنیایه یایلمش بر جمع پریشان‌ایکن روحاً محفل الفتده طوپلانمش و احساسات وجدانیّه‌یه مستغرق اولمش و جلوۀ حقیقته مظهر بیورلمش و مؤآنست روحانیّه و معاشرت وجدانیّه‌یه موفّق اولمشزدر ربّم سزن گبی حیران جمال احدیّت و پریشان طرّۀ پر پیچ و تاب دلبر رحمانیّت و مشتاق طلعت نورانیّت اولان ذوات روحانیّت‌سماتی هر بر موهبته و هدایته موفّق و مؤیّد ایلیه آمین یا ربّ العالمین ع ع