احبّای الهی علیهم بهآء اللّه الأبهی
ای حضرت احدیّت‌پرستان معشوق دلجویمز و محبوب خوشخویمز و مهربان دلسوزمز و جمال شب‌افروزمز صفت رحمانیّت ایله و تربیت ربوبیّت ایله بزی پرورده و انواع لطف و عنایت ایله و ریزش نیسان رحمت ایله دردانه‌آسا آغوش صدف ناز و نعمتده بزی پرورش ایلدی و مظهر احسان بی‌پایان بیوردی و بو جمع پریشانی و گروه بی سر و سامانی زیر جناح پرفلاح حضرت رحمانیّتده مستظلّ و کافّۀ اسماء و صفات و کمالات ایله اشراق و تجلّی ایلدی تا حقیقت انسانیّه مرکز سنوحات مقدّسۀ رحمانیّه اولوب عالم بشریّتی تزیین ایدن خصائل و فضائل معنویّه ایله بین البشر حشر اوله‌لم بز ایسه او الطاف بی‌پایان و عنایت غیرمتناهی‌یی انودوب دام هوا و هوسه گرفتار و مانند بوم بدکردار بو خرابه‌زار و دنیاء مرداره مفتون اولدق بلکه مجنون اولدق فاعتبروا یا اولی الأبصار ع ع
مهربان رحمانم توفیق و قدر رفیق و رهبر اولمینجه جهد بشر و سعی مرغ بی بال و پر نه ثمر ایراث ایدر عاقبت خائب اولور خاسر اولور تائب اولور بز عاجزز قاصرز ضعیفز نحیفز فقیرز حقیرز یِتِش فریادمزه عون و عنایتنی بزه رهبر ایله صون و حمایتنی بزه حصن حصین عالم اکبر ایله ع ع
یا ربّ بو جمع شمع‌آسا یانوب شعاعنی شش جهته منتشر و ظلمات دیجوری تجلّی نور ظهور ایله مضمحل ایله بو محفلی یا ربّ مرکز فضائل ایله و بو انجمنی یا رحمن مطلع احسان ایله ع ع